सिमकोट । छिमेकी जिल्ला मुगुमको सोरु गाउँपालिका-७ सीप स्थानमा जीप दुर्घटना हुँदा चार जनाको मृत्यु भएको छ भने पाँच जना घाइते भएका छन् । घाइतेको तारापानि स्वास्थ्य चौकीमा उपचार भइरहेको मुगु जिल्ला प्रहरी नायव उपरीक्षक महेश बस्नेतले बताउनुभयो ।

सोरुकोटदेखि गमगढीतर्फ जाँदै गरेको ग १ ज ७७६२ नम्बरको जीप पहिरो नजिकैको डिलबाट करिब २ सय मिटर तल खस्दा दुई जनाको घटनास्थलमै मृत्यु भएको छ भने दुई जनाको स्थानीय स्वास्थ्य चौकी तारापानीमा मृत्युु भएको प्रनाउ बस्नेतले बताउनुभयो ।

मृतक र घाइतेको पहिचान हुन नसकेको मुगु प्रहरीले जनाएको छ । घाइतेहरूको उद्धारको लागि सोरुकोट प्रहरी चौकी र तारापानी प्रहरी चौकीको प्रहरी टोली घटनास्थलतर्फ खटिएको छ ।

घाइतेलाई उपचारको लागि जिल्ला अस्पताल ठिनी लैजान जिल्ला प्रहरी कार्यालयले दुई एम्बुलेन्स घटनास्थलतर्फ पठाएको छ ।

सोरु गाउँपालिकाको सीप भन्ने स्थानमा जीप दुर्घटना भएको हो  भने दुई सय मिटर तल खसेको प्रहरीले जनाएको हो ।

मृतक र घाइतेको उद्वार भइरहेको मुगु प्रहरीले जनाएको छ ।